ஜாவாஸ்க்ரிப்ட்

உயிர்மை இதழும், தமிழுக்கான ரெகுலர் எக்ஸ்ப்ரஷனும்

சு. க்ருபா ஷங்கர் — Wed, 20 Aug 2008 20:15:06 GMT

மனுஷ்யபுத்திரன் நடத்தும் உயிர்மை இதழை இணையத்திலும் படிக்க முடியும் என்பதை இன்றுதான் அறிந்து கொண்டேன். இதைப் படிப்பதற்கு அத்தளத்தில் உறுப்பினராகப் பதிந்துகொள்ள வேண்டும். இதற்கு கட்டணம் ஏதும் கிடையாது. இத்தளம் .நெட் தொழில்நுட்பத்திலேயே உருவாக்கப்பட்டுள்ளது.

இத்தளத்தில் ஒரு சிறு குறை, விண்ணப்பப்படிவத்தில் நம் பெயரைத் தமிழில் கொடுக்க முடியாது. ஆங்கிலத்தில்தான் கொடுக்க முடியும். டாட்நெட்டின் உள்ளமைந்த வேலிடேஷன் கண்ட்ரோல்களைக் கொண்டே பயனர் கொடுக்கும் விவரங்களைச் சரிபார்க்குமாறு அமைத்திருக்கிறார்கள். அவ்வகையில், பெயரைச் சரிபார்க்க, ரெகுலர் எக்ஸ்ப்ரஷன் கண்ட்ரோலைப் பயன்படுத்தி இருக்கிறார்கள். எனினும் இந்த கண்ட்ரோலின் வேலிடேஷன் எக்ஸ்ப்ரஷனாக ^[a-z A-Z]+$ என்று கொடுத்துள்ளார்கள். இதனால், ஆங்கில எழுத்துக்கள் மற்றும் வெற்றிடத்தைத் தவிர வேறு எந்த ஒரு எழுத்தையும் பெயரை உள்வாங்கிக்கொள்ளும் டெக்ஸ்ட்பாக்ஸ் அனுமதிக்காது.

எனவே, இந்த ரெகுலர் எக்ஸ்ப்ரஷனில் இத்தள நிர்வாகிகள் ஒரு சிறு மாறுதல் செய்தால் இப்பிரச்சனை சரியாகிவிடும். ^[a-z A-Z]+$ என்று இருக்கும் எக்ஸ்ப்ரஷனை, ^[a-z A-Z ஃ-ௗ]+$ என்று மாற்றிவிட்டால் போதும், தமிழ் மற்றும் ஆங்கிலம் இரண்டையுமே உள்ளிடலாம். யூனிகோட் சார்ட்டின் படி, தமிழ் எழுத்துக்கள் 2946 இடத்திலிருந்து 3058 வரையிலும் இருக்கின்றன. இதில் 3047லிருந்து 3058 வரையான இடங்கள் தமிழ் எண்களுக்காக ஒதுக்கப்பட்டுள்ளன. எனவே, என்று பெயர்களைத் தமிழில் சரிபார்க்க ஃ-௲ என்று ரெகுலர் எக்ஸ்ப்ரஷன் தவராகும். அதனால், ஃ-ௗ என்று கொடுப்பதே சரியானது. ம்ம், ஆமாம். யூனிகோடின் கணக்குப்படி, தமிழின் முதல் எழுத்து ஃ தான்

இதேபோல், ஒருவரது வயது, அனுபவம் போன்றவற்றை தமிழ் எண்களின் படி சரிபார்க்க வேண்டுமென்றால், ரெகுலர் எக்ஸ்ப்ரஷனில் ^[௧-௲]+$ என்று கொடுக்கவேண்டும். கவனிக்கவும், க, ௧ இரண்டும் பார்ப்பதற்கு ஒரே மாதிரியாக இருந்தாலும் இரண்டும் வெவ்வேறானவை. முந்தயது தமிழ் எழுத்து. பிந்தையது தமிழில் 1 என்ற எண்ணைக் குறிக்கும் எழுத்து.

பி.கு.: நான் இங்கே கொடுத்திருக்கும் ரெகுலர் எக்ஸ்ப்ரஷனில் யூனிகோட் 3.2 அட்டவணையை மட்டுமே எடுத்துக்கொண்டுள்ளேன். 4.1, 5.0 எல்லாம் பற்றி தெரியவில்லை. எனவே, 3046ல் உள்ள பூஜ்ஜியத்தையும் இதில் சேர்க்கவில்லை. தமிழில் எண்களை எழுதும்போது ‘பூஜ்ஜியம்' தேவையே இல்லை என்பது வேறு விஷயம். இன்னொரு விஷயம், தமிழில் பின்னங்களை நம் முன்னோர்கள் எத்தனையோ நுணுக்கமாகப் பயன்படுத்தி, அதற்கென தனித்தனிப் பெயர், எழுத்துக் குறியீடு எல்லாம் வைத்திருந்தாலும் அவையெல்லாம் யூனிகோடில் இணையும் அளவுக்குப் புண்ணியம் செய்திருக்கவில்லை. எனவே, பின்ன எழுத்துக்களை இந்தோ-அரபி எழுத்து முறையிலேயே பயன்படுத்திக்கொள்ளவேண்டியதுதான்.

டெக்ஸ்ட் ஏரியாவின் அதிகபட்ச அளவை வரையறுக்க...

சு. க்ருபா ஷங்கர் — Tue, 29 Jan 2008 03:29:18 GMT

சாதாரண டெக்ஸ்ட்பாக்சில் இத்தனை இத்தனை எழுத்துக்களுக்குமேல் உள்ளீடு செய்யக்கூடாது என்பதை MaxLength பண்பைக் கொண்டு சுலபமாக வரையறுத்து விடலாம். ஆனால் டெக்ஸ்ட் ஏரியாவில் இது சாத்தியமில்லை.

எனவேதான் asp:TextBox கண்ட்ரோலில் TextMode=MultiLine என்று கொடுத்துவிட்டு, MaxLength ப்ராப்பர்ட்டியில் எவ்வளவு அளவு கொடுத்தாலும் ப்ரௌசரில் பார்க்கும் பொழுது அது எடுபடுவதில்லை. எனினும் சில நேரங்களில் டெக்ஸ்ட் ஏரியாவினுள் தரப்படும் தகவல்களையும் கூட ஒரு குறிப்பிட்ட அளவுக்கு மேல் ஏற்றுக்கொள்ள முடியாதவாறு வரையறுப்பது தேவையாகிறது.

இதற்கு ASP.NET என்று இல்லாமல் இதர தொழில்நுட்பங்களிலும் பின்பற்றப்படும் ஒரு முறை, படிவத்தை (ஃபார்ம்) சப்மிட் செய்தவுடன் onsubmit ஈவெண்ட்டில் குறிப்பிட்ட டெக்ஸ்ட் ஏரியாவின் அளவைப் பரிசோதித்து, ஃபார்ம் சப்மிட் ஆவதைத் தடுப்பதுதான். இப்படி தடுத்தவுடன் பயனருக்கு ஒரு அலர்ட் பாக்ஸ் வழியாக தகவலின் அளவைக் குறைக்கச்சொல்லி அறிவிக்கலாம்.

ஆனால் நிறைய டெக்ஸ்ட் ஏரியா இருக்கும் ஒரு இணையப்படிவத்தில் இந்த வழி சற்று கடினமானது. இதற்கான தீர்வு, ஏஎஸ்பி.நெட்டில் உள்ள வேலிடேஷன் கண்ட்ரோலில் இருக்கிறது. மேம்போக்காகப் பார்த்தால், LengthValidator என்றெல்லாம் எதுவும் டூல்பாக்சில் காணப்படாது. ஆனால் இதற்கு ரெகுலர் எக்ஸ்ப்ரஷன் வேலிடேட்டர் (RegularExpressionValidator) கண்ட்ரோலைப் பயன்படுத்தலாம். வேலிடேஷன் எக்ஸ்ப்ரஷன் (ValidationExpression) பண்பில், கீழ்க்கண்டவாறு கொடுக்கவேண்டும்:

(.|\r|\n){1,500}

இதில் 1 என்பது குறைந்தபட்ச தகவல் அளவையும், 500 என்பது அதிகபட்ச தகவல் அளவையும் குறிக்கும். இந்த டெக்ஸ்ட் பாக்சின் character length 200தான் இருக்கவேண்டும் என்றால், இப்படி மாற்றிக்கொள்ளலாம்:

(.|\r|\n){1,200}

இப்பொழுது முழு உதாரணம் கீழே:

<asp:TextBox ID="txtTextbox" runat="server" Rows="4" TextMode="MultiLine" Width="150px"></asp:TextBox>

<asp:RegularExpressionValidator ID="regTextbox" runat="server" ControlToValidate="txtTextbox" Display="Dynamic" ErrorMessage="Length should not exceed 200 characters" SetFocusOnError="True" ValidationExpression="(.|\r|\n){0,200}"></asp:RegularExpressionValidator>

மற்றுமொரு ஜாவாஸ்க்ரிப்ட் ஃப்ரேம்வொர்க்

சு. க்ருபா ஷங்கர் — Mon, 14 Jan 2008 17:21:52 GMT

சி#, பைத்தான், விபி.நெட் ஆகியவற்றுக்குப் புள்ளிவலையைப் போலவே, ஜாவாஸ்க்ரிப்ட்டுக்கும் பல சட்டகாங்கள் (ஃப்ரேம்வொர்க்) இருக்கின்றன. ஜாவாஸ்க்ரிப்ட் என்பதை விட ஜாவாஸ்க்ரிப்ட்+ஸ்டைல்ஷீட் என்று சொல்லுவதே மிகவும் பொருத்தமாக இருக்கும்.

இதில் வடிவமைப்பு, அழகு அடிப்படையில் யாஹுவின் YUIயும், ஆற்றலுக்குjQueryயும், இவை இரண்டுக்கும் சேர்த்து dojoவும் சேர்ந்து விளங்குகின்றன. ஒரு சாதாரண இணையப்பயன்பாட்டைக்கூட எங்கேயோ சிவாஜி, பில்லா அளவிற்கு தூக்கி நிறுத்தும் அற்புதமான விஷயம்
இப்படிப்பட்ட ஜாவாஸ்க்ரிப்ட் ஃப்ரேம்வொர்க். இதை எல்லாம் விட, மைக்ரோசாஃப்டே தரும் ASP.NET Ajax 1.0வும் இருக்கவே இருக்கிறது. இவை எல்லாவற்றிலுமே உள்ள ஒரு சிறப்பான விஷயம், எல்லா இணாய உலாவிகளிலுமே ஒரே மாதிரி நன்றாக இயங்கும் என்பதுதான். அதற்காக லின்க்சில் இயங்குமா என்றெல்லாம் கேட்க்ககூடாது.

ஆனால் இன்று காலையில் நான் பார்த்த ExtJS எல்லாவற்றையும் தூக்கி சாப்பிட்டுவிடும் போலிருக்கிறது. ExtJS உதாரணப்பகுதியில் "இணைய டெஸ்க்டாப்" என்று ஒரு மாதிரிப் பக்கம் இருக்கிறதே, அப்ப்ப்ப்ப்ப்பா!!!! கொன்னுட்டாங்க! ஒக்காந்து யோசிப்பாய்ங்ஙளோ?